Eron Yaman poytaxtidagi elchixonasini yopgani haqidagi mish-mishlarni rad etdi

Eron tashqi ishlar vaziri o‘rinbosari Husayn Amir Abdullohiyon mamlakat qurolli to‘qnashuvlar davom etayotgan Yamandan o‘z elchisini chaqirib olgani haqidagi xabarlarni rad etdi. Bu haqda “RIA Novosti” xabar bermoqda.

Avvalroq Al Jazeera telekanali Eron Yamandagi elchixonasini yopmoqchi ekanligi, elchi hamda elchixonaning barcha xodimlari Yaman poytaxti Sanani tark etib bo‘lgani haqida xabar bergandi. “Sanadagi elchimiz davolanish maqsadida bir necha kunga Eronga qaytgan. Biz Yamandagi elchixonani yopish haqida qaror qabul qilganimiz yo‘q”, — dedi vazir o‘rinbosari.

Diplomatning qayd etishicha, Eron elchisi shahar Saudiya Arabistoni qurolli kuchlari tomonidan bombardimon qilinayotganida ham Sanada edi. “Yamandagi elchixonamiz o‘z faoliyatini odatdagi tartibda davom ettirishiga hech qanday shubha yo‘q”, — deya qo‘shimcha qildi Abdullohiyon.