Qozog‘istonning Baykonur shahridagi hovlilarning birida 12-sentabrga o‘tar kechasi ikki bezori erkak o‘qotar quroldan o‘quvchi va talabalar guruhiga qarata yetti marta o‘q uzdi. Bu haqda “Nur.kz” xabar bermoqda.
Rossiya Tergov qo‘mitasining “Baykonur” majmuasi bo‘yicha bo‘linmasi xabariga ko‘ra, hodisa natijasida 1999-yilda tug‘ilgan jabrlanuvchi shifoxonaga yetmay vafot etgan, yana uch kishi — 1991, 1992 va 1997-yillarda tug‘ilgan jabrlanuvchilar tan jarohati olgan, ularning ikki nafari ayni vaqtda jonlantirish bo‘limida qolmoqda.
Mazkur holat bo‘yicha bo‘yicha jinoyat ishi qo‘zg‘atilgan, gumonlanuvchilarning shaxsi aniqlanib, hozirgi vaqtda ularni izlash ishlari boshlab yuborilgan. Hodisa yuzasidan dastlabki tergov-surishtiruv harakatlari olib borilmoqda.
Ma’lumot uchun, Baykonur shahrini ham o‘z ichiga olgan “Baykonur” majmuasi Qozog‘iston tomonidan Rossiyaga ijaraga berilgan va bu hududda tergov harakatlari Rossiya Tergov qo‘mitasi tomonidan olib boriladi.
Izoh (0)