Gyoteborg universiteti geologlari Yemtland okrugidagi ikki katta meteoritning qulashi oqibatida hosil bo‘lgan kraterlarni ilk bor aniqladi. “Phys.org” resursining yozishicha, kraterlarning paydo bo‘lishiga sabab bo‘lgan meteoritlar Mars va Yupiter oralig‘idagi asteroidlarning qadimiy to‘qnashuvi qoldig‘i bo‘lishi mumkin.
Olimlarning hisob-kitoblariga ko‘ra, meteoritlarning qulashi va kraterning paydo bo‘lishi taxminan 458 million yil avval yuz bergan. Katta krater Shvetsiyaning Estersund shahridan 20 kilometr janubda joylashgan va diametri 7,5 kilometrga teng. Kichik krater esa undan 16 kilometr narida va diametri 0,7 kilometr.
“Taxminan 470 million yil avval ikki katta asteroid Mars va Yupiter orbitalari oralig‘ida to‘qnashib ketgan va ularning ko‘plab bo‘laklari har turli trayektoriya bo‘ylab uchib ketgan. Ba’zi qoldiqlar Yerga qulagan bo‘lib, Yemtland grafligidagi meteorit ham shular jumlasidandir”, — dedi geolog Erik Sturkell.
Yemtland grafligining hozirgi o‘rnida qadimgi davrlarda dengiz bo‘lgan bo‘lib, meteoritlar qulagan vaqtda uning chuqurligi 0,5 kilometrga teng bo‘lgan. Asteroidlarning qoldiqlari qulashi natijasida bu hududlar qisqa muddatga (bir necha daqiqaga) qurib qolgan va keyinroq yana suv bilan to‘lgan.
Izoh (0)