Гётеборг университети геологлари Емтланд округидаги икки катта метеоритнинг қулаши оқибатида ҳосил бўлган кратерларни илк бор аниқлади. «Phys.org» ресурсининг ёзишича, кратерларнинг пайдо бўлишига сабаб бўлган метеоритлар Марс ва Юпитер оралиғидаги астероидларнинг қадимий тўқнашуви қолдиғи бўлиши мумкин.
Олимларнинг ҳисоб-китобларига кўра, метеоритларнинг қулаши ва кратернинг пайдо бўлиши тахминан 458 миллион йил аввал юз берган. Катта кратер Швециянинг Эстерсунд шаҳридан 20 километр жанубда жойлашган ва диаметри 7,5 километрга тенг. Кичик кратер эса ундан 16 километр нарида ва диаметри 0,7 километр.
«Тахминан 470 миллион йил аввал икки катта астероид Марс ва Юпитер орбиталари оралиғида тўқнашиб кетган ва уларнинг кўплаб бўлаклари ҳар турли траектория бўйлаб учиб кетган. Баъзи қолдиқлар Ерга қулаган бўлиб, Емтланд графлигидаги метеорит ҳам шулар жумласидандир», — деди геолог Эрик Стуркелл.
Емтланд графлигининг ҳозирги ўрнида қадимги даврларда денгиз бўлган бўлиб, метеоритлар қулаган вақтда унинг чуқурлиги 0,5 километрга тенг бўлган. Астероидларнинг қолдиқлари қулаши натижасида бу ҳудудлар қисқа муддатга (бир неча дақиқага) қуриб қолган ва кейинроқ яна сув билан тўлган.
Изоҳ (0)