Tokio Pxenyandan o‘g‘irlab ketilgan yaponiyaliklar ishi bo‘yicha surishtiruvlarni davom ettirishni talab qildi

Yaponiya Shimoliy Koreyadan o‘g‘irlab ketilgan yapon fuqarolari muammosini tekshirishni davom etishni talab qildi. Pxenyan norasmiy muzokaralar chog‘ida Tokioga o‘tgan yil mobaynida bu yo‘nalishda hech qanday yangi ma’lumotlar aniqlanmaganini bildirgach, shunday talab qo‘yilgan. Bu haqda “TASS” xabar bermoqda.

Eslatib o‘tamiz, 2014-yil may oyida ikki mamlakat hukumati Shimoliy Koreya razvedkasi tomonidan yapon fuqarolarining o‘tgan asrning 70-yillarida o‘g‘irlab ketilishi yuzasidan yangi surishtiruvlar o‘tkazish bo‘yicha kelishib olgan, shundan so‘ng Tokio Pxenyanga qarshi sanksiyalarning bir qismidan voz kechishga rozi bo‘lgandi.

Yaponiya koreys tomonining surishtiruvlar o‘tkazilgani to‘g‘risidagi hisobotini tekshirish uchun KXDRga maxsus guruh jo‘natishni ham rejalashtirgan.