Bugungi kunda O‘zbekiston davlat jahon tillari universitetining moddiy-texnik bazasini mustahkamlash va kengaytirish borasida qator ishlar amalga oshirilmoqda. Bu haqda “Daryo”ning shtatdan tashqari muxbiri Madina Nurman xabar berdi.
O‘zbekiston Respublikasi Prezidentining 2013-yil 23-maydagi “O‘zbekiston davlat jahon tillari universitetining faoliyatini takomillashtirish chora-tadbirlari to‘g‘risida”gi PQ-1971-sonli va O‘zbekiston Respublikasi Vazirlar Mahkamasining 2013-yil 13-avgustdagi “O‘zbekiston davlat jahon tillari universitetining moddiy-texnik bazasini yanada rivojlantirish chora-tadbirlari to‘g‘risida”gi 222-sonli qarorlari bo‘yicha qurilish ishlari boshlangan edi.
2013—2015-yillarda O‘zbekiston davlat jahon tillari universitetining 8 ta obyektlari qurilishi, rekonstruksiyasi va kapital ta’mirlanishi investitsiya dasturiga kiritildi.
Jumladan, ikkita yangi: 2200 o‘rinli o‘quv ma’muriy binosi va yangi sport majmuasi qurilishi joriy yilning sentabr oyiga qadar tugallanishi rejalashtirilgan.
5 ta asosiy bino: 2 ta o‘quv binosi, 1 ta axborot-resurs markazi, 1 ta talabalar turar joyi va 1 ta oshxona binosi, xorijiy mutaxassislar uchun 20 o‘rinli mehmonxonalarni qurish va rekonstruksiya qilish ishlari amalga oshirilmoqda.
Mazkur obyektlarni zamonaviy talablar asosida qurish, rekonstruksiya qilish va kapital ta’mirlash hamda zamonaviy o‘quv jihozlari bilan ta’minlash uchun shu kunga qadar jami 106,8 milliard so‘m mablag‘ ajratilgan.
Izoh (0)