Toshkent shahridagi Inha universitetida O‘zbekistonning Mustaqillik bayramiga bag‘ishlab, “Betakrorimsan, yagonasan, ona Vatanim — O‘zbekistonim!” shiori ostida tadbir o‘tkazildi, deya xabar bermoqda universitet matbuot xizmati.
Universitet rektori Sh.Shermatov tadbirda so‘zga chiqib, joriy yilning 17-iyul kuni O‘zbekiston Prezidenti Islom Karimov mamlakat mustaqilligining 24 yillik bayramiga tayyorgarlik ko‘rish va uni o‘tkazish to‘g‘risidagi qarori doirasida ta’lim maskanida ham chora-tadbirlar dasturi ishlab chiqilganligi hamda mazkur yo‘nalishda qator ishlar qilinganligini qayd etib o‘tdi. Jumladan, o‘tgan yili o‘zining 100 yilligini nishonlagan O‘zbek milliy akademik drama teatri jamoasining taniqli san’atkorlari, O‘zbekiston xalq artistlari Erkin Komilov va Yodgor Sa’diyev bilan uyushtirilayotgan ijodiy kecha ham mazkur dasturning ajralmas qismi ekanligini yana bir bor eslatib o‘tdi.
O‘zbekiston xalq artistlari Erkin Komilov hamda Yodgor Sa’diyev o‘z ma’ruzalarida hozirda ma’naviy hayotni yuksaltirish yo‘lida boshqalar havas qiladigan qanday natijalarga erishgan bo‘lsak, hech shubhasiz, bu borada teatr san’ati, xususan, O‘zbek Milliy akademik drama teatrining ham munosib hissasi borligini ta’kidladi.
Davrani yanada qiziqtirish maqsadida aktyorlar anjuman tinglovchilariga o‘zlarining hayoti va ijodlari to‘g‘risida so‘zlab berdi. Ma’ruza yakunida ular anjuman ishtirokchilarini qiziqtirgan barcha savollariga atroflicha javob berdi.
Tadbir yakunida Toshkent shahridagi Inha universiteti tomonidan O‘zbek milliy akademik drama teatri aktyorlari, O‘zbekiston xalq artistlari E.Komilovga va Yo.Sa’diyevga o‘zlarining qimmatli vaqtlarini ayamay, ilm dargohiga tashrif buyurgani uchun minnatdorchilik bildirilib, esdalik sovg‘alari topshirildi.
Izoh (0)