“Katta Yevropani qurish” loyihasining sobiq mudofaa vazirlari, diplomatlardan tashkil topgan ishchi guruhi Rossiya va NATOga ochiq harbiy qarama-qarshilik ehtimolini kamaytiruvchi hujjatni imzolashni taklif qildi. Bu haqda “RBK” xabar bermoqda.
Murojaat ekspertlar guruhi tomonidan, xususan, Rossiya sobiq tashqi ishlar vaziri Igor Ivanov, uning britaniyalik hamkasbi Malkolm Rifkind, Polshaning sobiq tashqi ishlar vaziri Adam Rotfeld, Buyuk Britaniya, Germaniya va Fransiyaning sobiq mudofaa vazirlari tomonidan imzolangan.
Mualliflarning qayd etishicha, dengiz va havo kengliklarida Rossiya, NATO mamlakatlari, Shvetsiya va Finlandiya qurolli kuchlari ishtirokida 66 hodisa yuz bergan bo‘lib, ularning kamida uchtasi favqulodda tahlikali edi.
Hujjat mualliflarining fikricha, harbiy xizmatchilarning yuqori mahorati evaziga bunday vaziyatlarda yoqimsiz oqibatlardan qochishga muvaffaq bo‘linmoqda, biroq ishonchsizlik darajasi o‘sgan va keskinlik nisbatan yuqori bo‘lgan hozirgi sharoitda xavfli adashish yoki tasodif inqirozning yanada chuqurlashishiga va hatto ochiq harbiy qarama-qarshilikka sabab bo‘lishi mumkin.
Shu munosabat bilan, ekspertlar zudlik bilan Rossiya — NATO kengashini chaqirishni hamda unda AQSh va Xitoy o‘rtasida 2014-yilda imzolangan bitimga o‘xshash kelishuvni imzolashga chorlamoqda. Mazkur kelishuvda munosabatlarning tamoyillari va jarayonlari belgilanishi, shuningdek, o‘zaro ishonch muhitini oshirishga qaratilgan bir qator qoidalar, xususan, operatsiyalarni o‘tkazish vaqtida harbiy-dengiz va harbiy-havo kuchlarining rejalashtirilayotgan harakatlari haqida oldindan ogohlantirish kabilar o‘rnatilishi kerak.
Ekspertlarning qayd etishicha, sovuq urush yillarida AQSh va sobiq ittifoq o‘rtasida ikkita shunday — 1972- va 1989-yilgi shartnomalar mavjud bo‘lgan. Endi bunday kelishuvni nafaqat NATOga a’zo qolgan mamlakatlar, balki Finlandiya va Shvetsiya ham imzolashi zarur.
Izoh (0)