«Катта Европани қуриш» лойиҳасининг собиқ мудофаа вазирлари, дипломатлардан ташкил топган ишчи гуруҳи Россия ва НАТОга очиқ ҳарбий қарама-қаршилик эҳтимолини камайтирувчи ҳужжатни имзолашни таклиф қилди. Бу ҳақда «RBK» хабар бермоқда.
Мурожаат экспертлар гуруҳи томонидан, хусусан, Россия собиқ ташқи ишлар вазири Игорь Иванов, унинг британиялик ҳамкасби Малкольм Рифкинд, Польшанинг собиқ ташқи ишлар вазири Адам Ротфельд, Буюк Британия, Германия ва Франциянинг собиқ мудофаа вазирлари томонидан имзоланган.
Муаллифларнинг қайд этишича, денгиз ва ҳаво кенгликларида Россия, НАТО мамлакатлари, Швеция ва Финландия қуролли кучлари иштирокида 66 ҳодиса юз берган бўлиб, уларнинг камида учтаси фавқулодда таҳликали эди.
Ҳужжат муаллифларининг фикрича, ҳарбий хизматчиларнинг юқори маҳорати эвазига бундай вазиятларда ёқимсиз оқибатлардан қочишга муваффақ бўлинмоқда, бироқ ишончсизлик даражаси ўсган ва кескинлик нисбатан юқори бўлган ҳозирги шароитда хавфли адашиш ёки тасодиф инқирознинг янада чуқурлашишига ва ҳатто очиқ ҳарбий қарама-қаршиликка сабаб бўлиши мумкин.
Шу муносабат билан, экспертлар зудлик билан Россия — НАТО кенгашини чақиришни ҳамда унда АҚШ ва Хитой ўртасида 2014 йилда имзоланган битимга ўхшаш келишувни имзолашга чорламоқда. Мазкур келишувда муносабатларнинг тамойиллари ва жараёнлари белгиланиши, шунингдек, ўзаро ишонч муҳитини оширишга қаратилган бир қатор қоидалар, хусусан, операцияларни ўтказиш вақтида ҳарбий-денгиз ва ҳарбий-ҳаво кучларининг режалаштирилаётган ҳаракатлари ҳақида олдиндан огоҳлантириш кабилар ўрнатилиши керак.
Экспертларнинг қайд этишича, совуқ уруш йилларида АҚШ ва собиқ иттифоқ ўртасида иккита шундай — 1972- ва 1989 йилги шартномалар мавжуд бўлган. Энди бундай келишувни нафақат НАТОга аъзо қолган мамлакатлар, балки Финландия ва Швеция ҳам имзолаши зарур.
Изоҳ (0)