Buyuk Britaniya La-Mansh bo‘g‘ozi ostidan o‘tgan Yevrotunnel orqali noqonuniy muhojirlar harakatlanishi oldini olish maqsadida xavfsizlik choralarini kuchaytirish niyatida. Bu haqda “Korrespondent.net” xabar bermoqda.
Britaniya bosh vaziri Devid Kemeron 31-iyul, juma kuni oqshomda Fransiya prezidenti Fransua Olland bilan bo‘lib o‘tgan telefon suhbati davomida mazkur masalani muhokama qilgan.
Buyuk Britaniya hukumati rahbari mazkur muammoni hal qilish uchun tunnelga Fransiya tomondan kirishda yangi to‘siqlar o‘rnatish va noqonuniy muhojirlarni izquvar itlar yordamida izlab topish masalasida o‘z qo‘shnisiga yordam berishga tayyor ekanligini bildirgan.
Avvalroq Kemeron qochoqlarning Yevropa qit’asidan Buyuk Britaniyaga kirib kelishi muammosini tezda hal qilib bo‘lmasligini aytib o‘tgandi. Uning so‘zlariga ko‘ra, Britaniya tomoni 2015-yil yozi oxirigacha noqonuniy migratsiyani cheklash uchun “barcha choralarni ishga soladi”.
28—29-iyul kunlari ikki mingga yaqin muhojir Yevrotunnel orqali Buyuk Britaniya hududiga kirib borishga urindi. Bu La-Manshni noqonuniy kechib o‘tish bo‘yicha eng ommaviy harakat holati bo‘ldi.
31-iyulga o‘tar kechasi yana bir necha yuzlab qochoqlar platformalarda turgan poyezd va yuk mashinalarga chiqib olib, Buyuk Britaniyaga kirishga harakat qildi. Fransiyaning Kale shahri atrofida esa tunnel orqali Britaniyaga o‘tishni maqsad qilgan 5 mingga yaqin muhojir to‘plangan.
Izoh (0)