Буюк Британия Ла-Манш бўғози остидан ўтган Евротуннель орқали ноқонуний муҳожирлар ҳаракатланиши олдини олиш мақсадида хавфсизлик чораларини кучайтириш ниятида. Бу ҳақда «Корреспондент.net» хабар бермоқда.
Британия бош вазири Дэвид Кэмерон 31 июль, жума куни оқшомда Франция президенти Франсуа Олланд билан бўлиб ўтган телефон суҳбати давомида мазкур масалани муҳокама қилган.
Буюк Британия ҳукумати раҳбари мазкур муаммони ҳал қилиш учун туннелга Франция томондан киришда янги тўсиқлар ўрнатиш ва ноқонуний муҳожирларни изқувар итлар ёрдамида излаб топиш масаласида ўз қўшнисига ёрдам беришга тайёр эканлигини билдирган.
Аввалроқ Кэмерон қочоқларнинг Европа қитъасидан Буюк Британияга кириб келиши муаммосини тезда ҳал қилиб бўлмаслигини айтиб ўтганди. Унинг сўзларига кўра, Британия томони 2015 йил ёзи охиригача ноқонуний миграцияни чеклаш учун «барча чораларни ишга солади».
28—29 июль кунлари икки мингга яқин муҳожир Евротуннель орқали Буюк Британия ҳудудига кириб боришга уринди. Бу Ла-Маншни ноқонуний кечиб ўтиш бўйича энг оммавий ҳаракат ҳолати бўлди.
31 июлга ўтар кечаси яна бир неча юзлаб қочоқлар платформаларда турган поезд ва юк машиналарга чиқиб олиб, Буюк Британияга киришга ҳаракат қилди. Франциянинг Кале шаҳри атрофида эса туннель орқали Британияга ўтишни мақсад қилган 5 мингга яқин муҳожир тўпланган.
Изоҳ (0)