O‘zbekistonda tadbirkorlar uchun “Bir darcha” markazlari 2016-yil yanvaridan ishga tushadi

O‘zbekistonda tadbirkorlarga ko‘rsatilayotgan davlat xizmatlarini “bir darcha” tamoyiliga asoslangan yagona markazlar orqali yetkazib berish har bir insonni internetga ulanish imkoniyati bilan ta’minlash, onlayn tizimlari va koll-markazlariga bo‘lgan ishonchsizlikni bartaraf etish bilan bog‘liq muammolarning har taraflama yechimi, deyish mumkin, deya xabar bermoqda BMT Taraqqiyot dasturining “O‘zbekiston Biznes forumi (III bosqich)” loyihasi matbuot xizmati.

Tadbirkorlarga “bir darcha” tamoyiliga asoslangan davlat xizmatlarini ko‘rsatish markazlari davlat boshqaruvi tizimi, elektron hukumat tizimini yanada takomillashtirish sohasidagina emas, balki tadbirkorlik muhitini yanada yaxshilash sohasida ham sifatli davlat xizmatlarini mutlaqo yangi bir bosqichga ko‘tarishga xizmat qilishi aniq. O‘zbekiston Respublikasi Prezidentining PF-4725 raqamli “Xususiy mulk, kichik biznes va xususiy tadbirkorlikning ishonchli himoyasini ta’minlash, ularning jadal rivojlanishi yo‘lidagi to‘siqlarni bartaraf etish bo‘yicha chora-tadbirlar to‘g‘risida”gi farmoniga muvofiq, mazkur markazlar 2016-yilning yanvar oyidanoq ishga tushishi ko‘zda tutilgan.

Rejaga ko‘ra, mazkur markazlar hozirda mavjud bo‘lgan shahar, tuman hokimliklari qoshidagi 193 ta tadbirkorlik subyektlarini ro‘yxatga olish bo‘yicha inspeksiyalar asosida yaratiladi. Ushbu inspeksiyalar dastlab hukumat qaroriga binoan tashkil etilgan.

Tadbirkorlar uchun “bir darcha” markazlarining ish tartibi nihoyatda sodda bo‘lishi ko‘zda tutilgan. Markazlarda elektron navbat tizimi joriy etilib, tegishli arizalar markazning mas’ul xodimi – operatori tomonidan ko‘rib chiqilishi tartibini belgilab beradi. Operator mijozni qabul qilib, lozim bo‘lsa tegishli hujjatlarni to‘ldirishga yordam beradi va uning arizasini ro‘yxatga qo‘yadi. Keyingi bosqichda ariza avtomatik ravishda tegishli davlat idorasi, muassasasiga yo‘naltiriladi. Arizaga javob ham shu markazning o‘zida taqdim etilib, arizachi kerakli davlat idorasiga to‘g‘ridan-to‘g‘ri murojaat qilishi ehtiyoji qolmaydi.

Shuningdek, arizachi Yagona interaktiv davlat xizmatlari portali (www.my.gov.uz) orqali ham murojaat etish imkoniyatiga ega. Onlayn ariza avtomatik ravishda tegishli davlat muassasasiga yo‘naltiriladi. Mazkur murojaat etish usulini qo‘llashda arizachi bu portaldan foydalanish tartibini bilishi, yoki undan foydalanish haqida ma’lumot beruvchi maxsus koll-markazga qo‘ng‘iroq qilishi lozim bo‘ladi.