Ўзбекистонда тадбиркорларга кўрсатилаётган давлат хизматларини «бир дарча» тамойилига асосланган ягона марказлар орқали етказиб бериш ҳар бир инсонни интернетга уланиш имконияти билан таъминлаш, онлайн тизимлари ва колл-марказларига бўлган ишончсизликни бартараф этиш билан боғлиқ муаммоларнинг ҳар тарафлама ечими, дейиш мумкин, дея хабар бермоқда БМТ Тараққиёт дастурининг «Ўзбекистон Бизнес форуми (III босқич)» лойиҳаси матбуот хизмати.
Тадбиркорларга «бир дарча» тамойилига асосланган давлат хизматларини кўрсатиш марказлари давлат бошқаруви тизими, электрон ҳукумат тизимини янада такомиллаштириш соҳасидагина эмас, балки тадбиркорлик муҳитини янада яхшилаш соҳасида ҳам сифатли давлат хизматларини мутлақо янги бир босқичга кўтаришга хизмат қилиши аниқ. Ўзбекистон Республикаси Президентининг ПФ-4725 рақамли «Хусусий мулк, кичик бизнес ва хусусий тадбиркорликнинг ишончли ҳимоясини таъминлаш, уларнинг жадал ривожланиши йўлидаги тўсиқларни бартараф этиш бўйича чора-тадбирлар тўғрисида»ги фармонига мувофиқ, мазкур марказлар 2016 йилнинг январь ойиданоқ ишга тушиши кўзда тутилган.
Режага кўра, мазкур марказлар ҳозирда мавжуд бўлган шаҳар, туман ҳокимликлари қошидаги 193 та тадбиркорлик субъектларини рўйхатга олиш бўйича инспекциялар асосида яратилади. Ушбу инспекциялар дастлаб ҳукумат қарорига биноан ташкил этилган.
Тадбиркорлар учун «бир дарча» марказларининг иш тартиби ниҳоятда содда бўлиши кўзда тутилган. Марказларда электрон навбат тизими жорий этилиб, тегишли аризалар марказнинг масъул ходими – оператори томонидан кўриб чиқилиши тартибини белгилаб беради. Оператор мижозни қабул қилиб, лозим бўлса тегишли ҳужжатларни тўлдиришга ёрдам беради ва унинг аризасини рўйхатга қўяди. Кейинги босқичда ариза автоматик равишда тегишли давлат идораси, муассасасига йўналтирилади. Аризага жавоб ҳам шу марказнинг ўзида тақдим этилиб, аризачи керакли давлат идорасига тўғридан-тўғри мурожаат қилиши эҳтиёжи қолмайди.
Шунингдек, аризачи Ягона интерактив давлат хизматлари портали (www.my.gov.uz) орқали ҳам мурожаат этиш имкониятига эга. Онлайн ариза автоматик равишда тегишли давлат муассасасига йўналтирилади. Мазкур мурожаат этиш усулини қўллашда аризачи бу порталдан фойдаланиш тартибини билиши, ёки ундан фойдаланиш ҳақида маълумот берувчи махсус колл-марказга қўнғироқ қилиши лозим бўлади.
Изоҳ (0)