Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi davlat ijtimoiy buyurtmalarini joylashtirish bo‘yicha 2015-yilda ilk bor tanlov o‘tkazdi. Mazkur tanlovda “Jamiyat” ijtimoiy-siyosiy gazetasi tahririyati “Keksalarimiz — bebaho boyligimiz” loyihasi bilan ishtirok etdi va bu loyiha davlat ijtimoiy buyurtmasi sifatida moliyalashtirildi.
Ayni paytda gazeta tahririyati O‘zbekiston Matbuot va axborot agentligi bilan ijtimoiy sheriklik asosida davlat ijtimoiy buyurtmasini bajarishni boshladi. Shu munosabat bilan “Jamiyat” gazetasi 2015-yil 28-iyul kuni “Keksalarimiz — bebaho boyligimiz” loyihasining taqdimotiga bag‘ishlangan matbuot anjumanini o‘tkazdi.
Unda Oliy Majlis huzuridagi Nodavlat notijorat tashkilotlarini qo‘llab-quvvatlash jamoat fondi mablag‘larini boshqarish bo‘yicha Parlament komissiyasi a’zolari, O‘zbekiston Matbuot va axborot agentligi, Fuqarolik jamiyati shakllanishini monitoring qilish mustaqil instituti, O‘zbekiston Nodavlat notijorat tashkilotlari milliy assotsiatsiyasi, nodavlat notijorat tashkilotlar, gazeta muassislari vakillari, ommaviy axborot vositalari, shu jumladan “Daryo” nashri ham ishtirok etdi.
Anjumanda davlat buyurtmasi sifatida moliyalashtirilgan ijtimoiy loyihaning maqsad-vazifalari, amalga oshirish mexanizmlari, undan kutilayotgan natijalar haqida batafsil so‘z yuritildi.
“Keksalarni e’zozlash yili” Davlat dasturi ijrosi doirasida O‘zbekistonda olib borilayotgan ishlarni keng yoritish maqsadida gazeta sahifalarida “Keksalarimiz — bebaho boyligimiz” deb nomlangan maxsus sahifa tashkil etildi.
Gazeta tahririyati “Keksalarimiz — bebaho boyligimiz” deb nomlangan ijodiy tanlov ham e’lon qildi. Loyihaning amalga oshirish muddati bir yil bo‘lib, tanlov g‘oliblari 2016-yil 27-iyun — Matbuot va ommaviy axborot vositalari xodimlari kuni arafasida e’lon qilinadi.
Loyiha doirasida shuningdek, Ikkinchi jahon urushi qatnashchilari, front orti mehnat faxriylari, nafaqadagi jurnalistlar va boshqa nuroniylarning Respublika bo‘yicha 800 nafarini “Jamiyat” ijtimoiy-siyosiy gazetasiga bepul obuna qilish nazarda tutilgan.
Izoh (0)