O‘zbekiston milliy terma jamoasi 25-iyul kuni O‘zbekiston olimpiya terma jamoasiga qarshi o‘rtoqlik uchrashuvi o‘tkazib, 2:0 hisobida g‘alaba qozondi. Ushbu uchrashuvdan so‘ng mamlakat bosh jamoasi murabbiyi Samvel Babayan OAV xodimlarining savollariga javob qaytardi, deb xabar beradi “Championat.asia”.
“Menimcha, bugungi o‘yin barchaga manzur keldi. Bu bahs sifat jihatidan avvalgi o‘yindan yuqori darajada o‘tdi. Ikkala o‘yinni taqqoslaydigan bo‘lsak, unda birinchi bahsda biroz charchoq alomatlari bilan o‘ynagandik. Sababi, futbolchilar ikkinchi davraga tayyorgarlik jarayonini o‘tkazmoqda. Futbolchilar yangi taktika, yangi o‘yin falsafasiga ko‘nikishlari lozim. Birinchi o‘yinda biz futbolchilarning individual mahoratini ko‘rib olishimiz zarur edi. “Jar”dagi bellashuvda jamoaviy o‘yinni tashkil etish borasida emas, balki har bir futbolchining imkoniyatlarini ko‘rib olish uchun ularni sinab ko‘rgandik. Bugungi uchrashuvda jamoaviy o‘yinni tashkil etish ustida ishladik. Har bir chiziqlar o‘rtasidagi bog‘liqliklarni ko‘rib oldik. Bu biz uchun juda muhim. Biz bugungi o‘yinda o‘zimiz istagan maqsadga erishdik. Bugun maydonga tushgan futbolchilar ichidan 5—6 kishi birinchi rasmiy o‘yinda boshlang‘ich tarkibda tushishlari mumkin. Ushbu o‘yinda biz ham, olimpiya terma jamoamiz o‘ziga kerakli xulosalarni chiqarib oldi. O‘yin menga yoqdi. Natija ham adolatli bo‘ldi. Ikkinchi bo‘limda yangi futbolchilar maydonga tushdi va o‘yinni kuchaytira oldi. Jasur Hasanovning mahorati, o‘yin sifati o‘z so‘zini aytdi. Jasur Hasanov tarkibimizdagi eng kuchli futbolchilardan biri hisoblanadi. Men unga ishonaman va Jasur Hasanov hali terma jamoamizga ko‘p foyda keltiradi”, — deydi Samvel Babayan.
Server Jeparov terma jamoaning birinchi rasmiy o‘yinigacha jarohatidan forig‘ bo‘ladimi?Vaziyatni o‘rganib boramiz. Barcha legionerlarni kuzatib turibmiz. Har bir terma jamoamizga yordam bermoqchi bo‘lgan o‘zbek fuqarosiga ega futbolchilar uchun eshigimiz ochiq. Bu yerda uning yoshi yoki boshqa omillar rol o‘ynamaydi. Terma jamoada sport prinsiplariga amal qilinadi. Jeparov esa jamoamizning yetakchi futbolchilaridan biri hisoblanadi.
Qaysi chiziq sizni ko‘proq bezovta qilmoqda?Meni chiziqlar o‘rtasidagi bog‘liqliklardagi muammolar ko‘proq tashvishga solmoqda. Yig‘in davomida asosiy e’tiborimizni aynan shu jihatga qaratdik. Bugun himoya markazida birgina Yegor Krimets o‘z ampluasida o‘ynadi va orqa chiziqda tartibli o‘yin ko‘rsatdik. Asosiy vazifamiz chiziqlar o‘rtasidagi bog‘liqliklarni vujudga keltirish.
Ravshan Haydarov Chimkentda Aleksandr Geynrixni o‘yinini kuzatib keldi. Bu borada fikringiz?Ravshan Haydarov Geynrixning o‘yinidan yaxshi taassurotlar bilan qaytib keldi. Bu mavzuni muhokama qildik. Sashani o‘zi bilan ham gaplashdik. Biz Geynrixga ishonamiz va uni terma jamoaga taklif qilamiz.
Rossiyada Vagiz Galiulin, Markov singari futbolchilarimiz ham bor...Biz hamma legionerlarni kuzatib bormoqdamiz. Barcha legionerlar haqida to‘liq ma’lumotlar to‘plab bormoqdamiz. Ularning statistik ma’lumotlaridan ham foydalanmoqdamiz. O‘yinlari lavhalarini ko‘rib chiqmoqdamiz. Barcha legionerlar bizning diqqat e’tiborimizda bo‘lib turibdi. Lobanovning o‘zbek fuqaroligini olish masalasi ham hal bo‘lgan.
Izoh (0)