Respublikachilar partiyasidan AQSh prezidentligiga nomzod milliarder Donald Tramp haqidagi biografik maqola 23-iyul, payshanba kuni Wikipedia internet-portalidan ikki marta o‘chirib tashlandi. Bu haqda “TASS” xabar bermoqda.
Maqolani tahrirlash tarixida qayd etilishicha, noma’lum shaxslar Wikipedia’ning ingliz tilidagi versiyasida shov-shuvga o‘ch siyosiy arbob va ishbilarmon haqidagi sahifadan ikki marta axborotlarni o‘chirib tashlagan. Maqola ikkinchi marta o‘chirilganida undagi axborot quyidagi gap bilan almashtirib qo‘yilgan: “U haqdagi ma’lumotlar hech kimga qiziq emasligini mard bo‘lib tan olaylik”.
Erkin onlayn-ensiklopediya hisoblangan Wikipedia maqolalarini xohlagan kishi tahrirlashi mumkin. Internet-bezorilik holatlari ham uchrab turgani bois, portal ma’muriyati ba’zi maqolalarni tahrirlash imkoniyatini cheklab qo‘ygan.
Respublikachilar partiyasidan AQSh prezidenti kursisi uchun kurashish uchun Trampdan tashqari, senatorlar Ted Kruz, Rend Pol, Marko Rubio, Arkanzas sobiq gubernatori Mayk Xakabi, neyroxirurg Ben Karson, Pensilvaniya shtatidan sobiq senator Rik Santorum, Hewlett-Packard’ning sobiq rahbari Keysik kurash olib bormoqda. Nyu-York shtati sobiq gubernatori Jorj Pataki kurashdan chiqqanini ma’lum qildi. Saylovda Respublikachilardan aynan kim asosiy nomzod bo‘lishi masalasiga partiyaning 2016-yil 18-21 iyul kunlari Klivlendda bo‘ladigan syezdida aniqlik kiritiladi.
Izoh (0)