Республикачилар партиясидан АҚШ президентлигига номзод миллиардер Дональд Трамп ҳақидаги биографик мақола 24 июль, пайшанба куни Wikipedia интернет-порталидан икки марта ўчириб ташланди. Бу ҳақда «ТАСС» хабар бермоқда.
Мақолани таҳрирлаш тарихида қайд этилишича, номаълум шахслар Wikipedia’нинг инглиз тилидаги версиясида шов-шувга ўч сиёсий арбоб ва ишбилармон ҳақидаги саҳифадан икки марта ахборотларни ўчириб ташлаган. Мақола иккинчи марта ўчирилганида ундаги ахборот қуйидаги гап билан алмаштириб қўйилган: «У ҳақдаги маълумотлар ҳеч кимга қизиқ эмаслигини мард бўлиб тан олайлик».
Эркин онлайн-энциклопедия ҳисобланган Wikipedia мақолаларини хоҳлаган киши таҳрирлаши мумкин. Интернет-безорилик ҳолатлари ҳам учраб тургани боис, портал маъмурияти баъзи мақолаларни таҳрирлаш имкониятини чеклаб қўйган.
Республикачилар партиясидан АҚШ президенти курсиси учун курашиш учун Трампдан ташқари, сенаторлар Тед Круз, Рэнд Пол, Марко Рубио, Арканзас собиқ губернатори Майк Хакаби, нейрохирург Бен Карсон, Пенсильвания штатидан собиқ сенатор Рик Санторум, Hewlett-Packard’нинг собиқ раҳбари Кейсик кураш олиб бормоқда. Нью-Йорк штати собиқ губернатори Жорж Патаки курашдан чиққанини маълум қилди. Сайловда Республикачилардан айнан ким асосий номзод бўлиши масаласига партиянинг 2016 йил 18-21 июль кунлари Кливлендда бўладиган съездида аниқлик киритилади.
Изоҳ (0)