Checheniston rahbari Ramzon Qodirov onasi Aymani Qodirova va bir qator amaldorlar bilan Makkadagi Ka’baga tashrif buyurdi. Bu haqda “TASS” xabar bermoqda.
Qodirov ijtimoiy tarmoqdagi sahifasidagi ma’lum qilishicha, musulmonlar uchun muqaddas sanalgan qadamjo ular uchun Saudiya Arabistoni qiroli buyrug‘iga asosan navbatdan tashqari ochib berilgan. Ka’baning ichki qismi yilda ikki marta faxriy mehmonlar uchun ochiladi.
Aymani Qodirovadan tashqari muqaddas qadamjoga 20 kishi, jumladan, Checheniston rahbari, uning opalari, rafiqasi, qizi, shuningdek, respublika muftiysi Saloh Hoji Mejiyev, Rossiya Davlat dumasi deputati Adam Delimxonov, Checheniston parlamenti raisi Magomed Daudov, Checheniston rahbari maslahatchisi Adam Shahidov va boshqalar kirgan.
“Men barcha ziyoratchilar va butun Checheniston xalqi nomidan qirol va qadrli akam Muhammad bin Salmonga tashakkurimni bildiraman. Musulmon kishi uchun Muqaddas Ka’baga kirishdan-da ortiqroq orzu va qimmatliroq hadya yo‘q”, — deya qo‘shimcha qildi Ramzon Qodirov.
Izoh (0)