Shimoliy Koreyada 19-iyul kuni bo‘lib o‘tgan mahalliy saylovlarda saylovchilarning 99,97 foizi ishtirok etdi. Bu haqda, KXDR Markaziy saylov komissiyasiga asoslanib, The Guardian nashri xabar bermoqda.
Nashrning qayd etishicha, saylovda KXDRning xorijda bo‘lgan fuqarolarigina qatnashmagan, xolos. Qariyalar va salomatligi saylov uchastkasiga borish imkonini bermaydigan shaxslar oldiga ko‘chma saylov urnalari olib borilgan.
Koreya markaziy telegraf agentligi xabariga ko‘ra, “saylovning barcha qatnashchilari noodatiy ishtiyoq bilan ovoz bergan”. O‘z fuqarolik burchini bajarganlar orasida, jumladan, KXDR yetakchisi Kim Chen In ham bor.
KXDRdagi saylovchilarga taklif qilinadigan ro‘yxatlarda faqat bir kishining ismi bo‘ladi. Nomzod hukmron Koreya Mehnat partiyasi tomonidan oldindan tasdiqlanadi. KMPga Kim Chen In yetakchilik qiladi.
Shuningdek, mamlakatda yana ikkita, amalda KMP nazorati ostidagi mayda siyosiy tashkilotlar bor. Bular — Osmon yo‘lining yosh do‘stlari partiyasi hamda Koreya sotsial-demokratlar partiyasi.
Shimoliy Koreyadagi saylovlarda saylovchilarning ishtirokiga doir raqamlar har doim yuqori bo‘lgan. Xususan, 2014-yilgi parlament saylovlarida ham saylovchilarning 99,97 foizi ishtirok etgandi.
KXDRda mahalliy qonunchilik organlari a’zolari 4 yil muddatga saylanadi. Mazkur davr mobaynida ular turli masalalarni muhokama qilish, xususan, mahalliy byudjetni tasdiqlash uchun yiliga bir yoki ikki marta yig‘iladi.
Izoh (0)