Чеченистон раҳбари Рамзон Қодиров онаси Аймани Қодирова ва бир қатор амалдорлар билан Маккадаги Каъбага ташриф буюрди. Бу ҳақда «ТАСС» хабар бермоқда.
Қодиров ижтимоий тармоқдаги саҳифасидаги маълум қилишича, мусулмонлар учун муқаддас саналган қадамжо улар учун Саудия Арабистони қироли буйруғига асосан навбатдан ташқари очиб берилган. Каъбанинг ички қисми йилда икки марта фахрий меҳмонлар учун очилади.
Аймани Қодировадан ташқари муқаддас қадамжога 20 киши, жумладан, Чеченистон раҳбари, унинг опалари, рафиқаси, қизи, шунингдек, республика муфтийси Салоҳ Ҳожи Межиев, Россия Давлат думаси депутати Адам Делимхонов, Чеченистон парламенти раиси Магомед Даудов, Чеченистон раҳбари маслаҳатчиси Адам Шаҳидов ва бошқалар кирган.
«Мен барча зиёратчилар ва бутун Чеченистон халқи номидан қирол ва қадрли акам Муҳаммад бин Салмонга ташаккуримни билдираман. Мусулмон киши учун Муқаддас Каъбага киришдан-да ортиқроқ орзу ва қимматлироқ ҳадя йўқ», — дея қўшимча қилди Рамзон Қодиров.
Изоҳ (0)