Yaponiyaning ALE startapi turli universitetlarning tadqiqotchilari bilan hamkorlikda buyurtmaga meteoritlar yomg‘irini uyushtirish imkonini beradigan texnologiyani ishlab chiqayotganini e’lon qildi. Bu haqda CBS News xabar bermoqda.
Loyiha mualliflarining qayd etishicha, ular maxfiy ximiyaviy birikma ishlab chiqqan — u meteoritlar yomg‘iri imitatsiyasini tashkil etishda asosiy rolni o‘ynaydi. Moddalar diametri taxminan 3 santimetr bo‘lgan sharlarga solinadi va kichik sun’iy yo‘ldosh orqali Yerga tashlanadi. Haqiqiy meteoritlar singari uning imitatsiyasi ham soniyasiga 8 kilometr tezlikda Yer atmosferasiga kirib kelayotgan vaqtda yonishni boshlaydi.
Bir dona meteoritning narxi taxminan 8,1 ming dollarni tashkil etadi. ALE vakillarining qayd etishicha, meteoritlar yomg‘iri shu qadar yorqin bo‘ladiki, ochiq havo sharoitida uni hatto shaharlarda ham ko‘rish mumkin bo‘ladi.
Meteoritlarni yog‘dirishda foydalaniladigan 50 santimetr hajmdagi yo‘ldosh-kub ishlab chiqilmoqda. Reja bo‘yicha, u Yer orbitasida shimoldan janubga tomon 400—500 kilometr balandlikda bir necha oy davomida harakat qiladi va shundan so‘ng qulab, atmosferada yonib ketadi. Tadqiqot mualliflari ximiyaviy formula tarkibiga o‘zgartirish kiritib, sun’iy meteoritning ortidan turli rangdagi iz qolishi ustida ish olib bormoqda.
Izoh (0)