Япониянинг ALE стартапи турли университетларнинг тадқиқотчилари билан ҳамкорликда буюртмага метеоритлар ёмғирини уюштириш имконини берадиган технологияни ишлаб чиқаётганини эълон қилди. Бу ҳақда CBS News хабар бермоқда.
Лойиҳа муаллифларининг қайд этишича, улар махфий химиявий бирикма ишлаб чиққан — у метеоритлар ёмғири имитациясини ташкил этишда асосий ролни ўйнайди. Моддалар диаметри тахминан 3 сантиметр бўлган шарларга солинади ва кичик сунъий йўлдош орқали Ерга ташланади. Ҳақиқий метеоритлар сингари унинг имитацияси ҳам сониясига 8 километр тезликда Ер атмосферасига кириб келаётган вақтда ёнишни бошлайди.
Бир дона метеоритнинг нархи тахминан 8,1 минг долларни ташкил этади. ALE вакилларининг қайд этишича, метеоритлар ёмғири шу қадар ёрқин бўладики, очиқ ҳаво шароитида уни ҳатто шаҳарларда ҳам кўриш мумкин бўлади.
Метеоритларни ёғдиришда фойдаланиладиган 50 сантиметр ҳажмдаги йўлдош-куб ишлаб чиқилмоқда. Режа бўйича, у Ер орбитасида шимолдан жанубга томон 400—500 километр баландликда бир неча ой давомида ҳаракат қилади ва шундан сўнг қулаб, атмосферада ёниб кетади. Тадқиқот муаллифлари химиявий формула таркибига ўзгартириш киритиб, сунъий метеоритнинг ортидан турли рангдаги из қолиши устида иш олиб бормоқда.
Изоҳ (0)