Kuni kecha Avstraliyada Liza laqabli koala Fantom nomli bolasi bilan birga katta yo‘lda mashina ostida qolib ketdi. Fit4Brain’ning yozishicha, ona koala boshidan va o‘pkasidan jarohat olgan, kichik jonivorga esa zarar yetmagan.
Koalaga zudlik bilan tibbiy yordam ko‘rsatilishi kerak edi, shu sababli ularning har ikkisi veterinariya tibbiyot markaziga olib kelindi.
Koalaning bolasi onasiz uzoq vaqt qolish uchun juda ham kichiklik qilgani uchun, shifokorlar operatsiya vaqtida uni onasidan ajratmaslikka qaror qildi. “Chaqaloq” onasini tinmay asta quchoqlab, shifokorlar o‘z ishini qilib bo‘lishini sabr bilan kutdi.
Mazkur holat aks etgan fotosurat internetda katta tezlik bilan tarqaldi — butun dunyo bo‘ylab qanchadan-qancha odamlar jonivorchaga hamdardlik bildirib, uning onasi tezroq sog‘ayib ketishini tiladi.
Klinika xodimlarining ta’kidlashicha, kichik koalaning quchoqlashlari jabrlanuvchi jonivorga ijobiy ta’sir qildi — hozirgi vaqtda Liza tezlik bilan sog‘aymoqda.
Izoh (0)