BMT Inson huquqlari bo‘yicha kengashi Isroilni 2014-yilda G‘azo sektorida amalga oshirilgan operatsiyalar vaqtida harbiy jinoyatlarga qo‘l urganlikda aybladi. Bu haqda “Echo.msk.ru” xabar bermoqda.
Isroilning mazkur harakatlarini qoralovchi rezolyutsiya uchun BMT Kengashiga a’zo deyarli barcha mamlakatlar ovoz berdi. Ular orasida Yevropa Ittifoqiga a’zo davlatlar ham bor.
Yahudiy davlati rahbariyati harbiy jinoyatlarda, jumladan, G‘azo sektoridagi operatsiyalar vaqtida turar-joy binolariga qasddan hujumlar uyushtirganlikda ayblanmoqda.
BMT inson huquqlari buzilishiga aloqador shaxslarni jazolashga chaqirmoqda. Bundan tashqari, rezolyutsiyada jabrlanuvchilarga tovon puli to‘lanishi kerakligi haqida ham so‘z boradi.
Ovoz berishda qatnashgan Yevropaning bir qator mamlakatlari vakillari yakuniy hujjatda Isroildagi tinch aholiga qarata HAMAS tomonidan uchirilgan raketalar haqida birorta so‘z yo‘qligiga e’tiborni qaratdi.
Kengashdagi Isroil elchisi esa mazkur rezolyutsiyani “Isroilga qarshi qaratilgan bayonot” deb atagan bo‘lsa, Isroil bosh vaziri Binyamin Netanyahu bu hujjat xalqaro terrorchilikka qarshi kurashni murakkablashtirishini aytib o‘tdi.
Izoh (0)