Ўзбекистон матбуот нашрлари ичида биринчилардан бўлиб «Хабар» газетасининг Android операцион тизимида ишлайдиган қурилмалар учун мўлжалланган мобил иловаси ишлаб чиқилди. Infocom.uz’нинг хабар беришича, iPhone ва iPad қурилмалари эгалари ҳам яқин кунлар ичида App Store дўконидан мобил иловани кўчириб олишлари мумкин бўлади.
Ахборот технологиялари ва коммуникацияларини ривожлантириш вазирлиги нашри ҳисобланган «Хабар» газетаси таҳрир ҳайъати раиси Хуршид Мирзоҳидовнинг ташаббуси ва вазирлик ҳомийлигида ҳамда BePro ёш дастурчилар маркази билан ҳамкорликда матбуот ва оммавий ахборот воситалари ходимлари куни арафасида газетанинг ўзига хос мобил иловаси тақдим қилинди.
Эндиликда «Хабар» газетасини босма шаклда қандай бўлса, худди шундайлигича мобил қурилмалар орқали электрон шаклда ўқиш имконияти бор. Нашрнинг янги сони автоматик равишда мобил қурилмада очилади. Саҳифаларни экранда «варақлаб», яқинлаштириб, йирикроқ шрифтларда мутолаа қилиш мумкин.
Газетанинг электрон шакли мобил иловада ҳар ҳафта жума куни янгиланади. Аввалги сонлар эса архивга тушади. Архивларни қурилмага юклаб олиш ва интернет ўчирилган ҳолатда ҳам бемалол исталган жойда газетани ўқиш имконияти бор.
Бундан ташқари, мобил иловада Ўзбекистон ахборот технологиялари тизими, жаҳон АКТ оламида рўй бераётган янгиликлар, таҳлилий мақолалар кун давомида янгиланиб борилади. Мобил иловани юклаб олиш бепул.
Изоҳ (0)