Ukraina ekologiya vaziri Igor Shevchenko mamlakat bosh vaziri Arseniy Yatsenyukni “siyosiy jazolash”, shuningdek, korrupsiya va Ukrainadagi klanlarning manfaatlarini himoya qilishda aybladi. Korrespondent.net’ning xabar berishicha, vazir bu haqdagi tegishli videomurojaatni Facebook’dagi sahifasiga joylashtirgan.
Shevchenkoning so‘zlariga ko‘ra, vazir lavozimida u korrupsiyaga qarshi kurash boshlagan va 22ta neft va gaz konlarini davlatga qaytargan. “Men bu ishlarni Ukrainaning barcha klanlari bilan aloqaga ega va ularning manfaatlarini himoya qiladigan hukumat rahbariyatining nuqtai nazariga zid ravishda amalga oshirdim”, - dedi vazir.
“Mening ayovsiz nuqtai nazarim va aksilkorrupsiyaviy faoliyatim sabab Arseniy Yatsenyuk shaxsiy hayotimga aralashib, meni iste’foga chiqarishga urina boshladi. Vazirlar Mahkamasi rahbariyati Sasha Borovik, Pavel Sheremet, Oleg Musiyga nisbatan qanday harakat qilgan bo‘lsa, menga ham shunday munosabatda bo‘lmoqda”, - deb hisoblaydi vazir.
Shevchenko Yatsenyukni turli lavozimlarga o‘z do‘stlari va korrupsiya mojarolariga aralashib qolgan partiyadoshlarini tayinlayotganlikda ham ayblab chiqqan. Avvalroq Ukraina bosh vaziri mamlakat parlamentidan Igor Shevchenkoni egallab turgan lavozimidan ozod etishni so‘ragandi.
Bosh vazir maslahatchisining ma’lum qilishicha, tekshiruvlar natijasida ekologiya vaziri 2015-yil yanvarida tegishli ruxsatnoma olmasdan shaxsiy ishlari yuzasidan BAAga ketib qolgani aniqlangan. Bundan avvalroq esa neft bazasidagi yong‘in vaqtida vazirning Nitsaga ketib qolgani mojaroga sabab bo‘lgandi.
Izoh (0)