Украина экология вазири Игорь Шевченко мамлакат бош вазири Арсений Яценюкни «сиёсий жазолаш», шунингдек, коррупция ва Украинадаги кланларнинг манфаатларини ҳимоя қилишда айблади. Korrespondent.net’нинг хабар беришича, вазир бу ҳақдаги тегишли видеомурожаатни Facebook’даги саҳифасига жойлаштирган.
Шевченконинг сўзларига кўра, вазир лавозимида у коррупцияга қарши кураш бошлаган ва 22та нефть ва газ конларини давлатга қайтарган. «Мен бу ишларни Украинанинг барча кланлари билан алоқага эга ва уларнинг манфаатларини ҳимоя қиладиган ҳукумат раҳбариятининг нуқтаи назарига зид равишда амалга оширдим», - деди вазир.
«Менинг аёвсиз нуқтаи назарим ва аксилкоррупциявий фаолиятим сабаб Арсений Яценюк шахсий ҳаётимга аралашиб, мени истеъфога чиқаришга урина бошлади. Вазирлар Маҳкамаси раҳбарияти Саша Боровик, Павел Шеремет, Олег Мусийга нисбатан қандай ҳаракат қилган бўлса, менга ҳам шундай муносабатда бўлмоқда», - деб ҳисоблайди вазир.
Шевченко Яценюкни турли лавозимларга ўз дўстлари ва коррупция можароларига аралашиб қолган партиядошларини тайинлаётганликда ҳам айблаб чиққан. Аввалроқ Украина бош вазири мамлакат парламентидан Игорь Шевченкони эгаллаб турган лавозимидан озод этишни сўраганди.
Бош вазир маслаҳатчисининг маълум қилишича, текширувлар натижасида экология вазири 2015 йил январида тегишли рухсатнома олмасдан шахсий ишлари юзасидан БААга кетиб қолгани аниқланган. Бундан аввалроқ эса нефть базасидаги ёнғин вақтида вазирнинг Ниццага кетиб қолгани можарога сабаб бўлганди.
Изоҳ (0)