Taniqli bastakor Jeyms Xorner aviahalokatga uchradi. Musiqachining o‘limini uning yordamchisi tasdiqladi, deb xabar beradi “Nur.kz”.
“Dahshatli fojia oilamiz boshiga tushdi. O‘zimga kelib olishim uchun menga ma’lum bir vaqt kerak. Biz yuragi keng va o‘ta iste’dodli ajoyib insonni yo‘qotdik. U o‘zi sevgan mashg‘ulot bilan shug‘ullanayotganida, olamdan o‘tdi. Qo‘llab-quvvatlashlaring va mehring uchun rahmat, boshqa hayotda ko‘rishamiz. Silviya”, — deb yozdi bastakorning yordamchisi Facebook’dagi sahifasida.
The Sydney Morning Herald nashri xabariga ko‘ra, bastakorga tegishli, halokatga uchragan bir motorli S312 Tucano samolyoti bortida faqat bir kishi bo‘lgan.
Jeyms Xornerga tegishli samolyot Kaliforniya shtatida qulagani haqida turli OAVda xabarlar chiqdi. Samolyot bo‘laklari orasidan bir jasad chiqqan, ammo uning shaxsini aniqlashning imkoni bo‘lmagan.
61 yoshli Jeyms Xorner afsonaviy My heart will go on qo‘shig‘ining bastakori hisoblanadi. Xorner “Titanik”, “Avatar”, “Tafakkur o‘yinlari”, “Sheryurak”, “Jumanji”, “Balto”, “Kommando”, “Zorro niqobi”, “Ramziy oq patlar”, “Troya”, “Yangi o‘rgimchak odam” va boshqa yana ko‘plab filmlarga musiqa yozgandi. U o‘z ishlari uchun “Oskar”, “Oltin Globus” va “Gremmi” mukofotlariga loyiq ko‘rilgandi.
Izoh (0)