O‘zbekistonlik yosh musiqachilar Italiyadagi xalqaro tanlovda sovrindorlar safiga kirdi

Italiyaning Barletta shahrida XXV xalqaro yosh ijrochilar tanlovi bo‘lib o‘tdi, deya xabar bermoqda “Jahon” axborot agentligi.

Tanlov fortepiano, torli va puflab chalinadigan musiqiy asboblar, ansaml ijrochiligi kabi yo‘nalishlarda o‘tkazildi. Shuningdek bellashuv ishtirokchilari yosh bo‘yicha guruhlarga bo‘lindi.

Italiyada 1990-yildan buyon o‘tkazib kelinadigan musiqa forumiga bu yil 54 mamlakatdan yosh iste’dod sohiblari keldi. Unda Toshkentdagi R. M. Glier nomidagi Respublika ixtisoslashgan musiqiy akademik litsey tarbiyalanuvchilari ham ishtirok etdi.

Skripka sinfi bo‘yicha mutlaq birinchi mukofotni Yusupova Asal qo‘lga kiritdi, Boshkaryov Dani ikkinchi bo‘ldi.

Fortepiano sinfi bo‘yicha birinchilikni Salohova Alisa va Murodbekova Sevara qo‘lga kiritdi, Yakubova Yasmina 2-o‘rinni band etdi.