Yozning issiq kunlarida chanqovbosdi ichimliklarga talab ortadi. Navoiylik ikki tadbirkor tomonidan ochilgan do‘konda ham ichimliklar savdosi yurishib qoldi, deb yozadi “Huquq” gazetasi.
Shunday kunlarning birida do‘konga kirgan mijoz Coca-Cola ichimligini so‘radi. Tadbirkor muzlatgichdan 1 dona Coca-Cola olib berib, mijozni iliq kuzatib qo‘ydi.
Mijoz yaxna ichimlikni ichar ekan, qandaydir noxush ta’mni sezdi va ichimlikdan shubhalanib, SVOJJDLQK departamentining Navbahor tuman bo‘limiga murojaat etdi-da, savdo do‘konidan sotib olgan Coca-Cola va Fanta ichimliklarini tekshirib ko‘rish uchun taqdim qildi.
Navoiy viloyat davlat sanitariya-epidemiologiya nazorati markazidan olingan xulosalarga ko‘ra, mijoz tomonidan taqdim qilingan ichimliklar qo‘lbola usulda qadoqlanganligi, iste’mol uchun yaroqsizligi, inson sog‘lig‘i va hayotining xavfsizligi talablariga javob bermasligi aniqlandi. Ushbu holat yuzasidan jinoyat ishi qo‘zg‘atildi. Shuningdek, tadbirkorlarning savdo do‘konida o‘tkazilgan tekshirishlarda yuqoridagi ichimliklaridan tashqari, kirim hujjati bo‘lmagan boshqa bir qancha oziq-ovqat mahsulotlari ham sotilayotganligi aniqlandi.
Sud zalida tadbirkorlar qilgan ishlaridan pushaymonliklarini bildirdi. Huquqbuzarlarga nisbatan sud hukmi bilan qonuniy jazo tayinlandi.
Izoh (0)