Ёзнинг иссиқ кунларида чанқовбосди ичимликларга талаб ортади. Навоийлик икки тадбиркор томонидан очилган дўконда ҳам ичимликлар савдоси юришиб қолди, деб ёзади «Ҳуқуқ» газетаси.
Шундай кунларнинг бирида дўконга кирган мижоз Coca-Cola ичимлигини сўради. Тадбиркор музлатгичдан 1 дона Coca-Cola олиб бериб, мижозни илиқ кузатиб қўйди.
Мижоз яхна ичимликни ичар экан, қандайдир нохуш таъмни сезди ва ичимликдан шубҳаланиб, СВОЖЖДЛҚК департаментининг Навбаҳор туман бўлимига мурожаат этди-да, савдо дўконидан сотиб олган Coca-Cola ва Fanta ичимликларини текшириб кўриш учун тақдим қилди.
Навоий вилоят давлат санитария-эпидемиология назорати марказидан олинган хулосаларга кўра, мижоз томонидан тақдим қилинган ичимликлар қўлбола усулда қадоқланганлиги, истеъмол учун яроқсизлиги, инсон соғлиғи ва ҳаётининг хавфсизлиги талабларига жавоб бермаслиги аниқланди. Ушбу ҳолат юзасидан жиноят иши қўзғатилди. Шунингдек, тадбиркорларнинг савдо дўконида ўтказилган текширишларда юқоридаги ичимликларидан ташқари, кирим ҳужжати бўлмаган бошқа бир қанча озиқ-овқат маҳсулотлари ҳам сотилаётганлиги аниқланди.
Суд залида тадбиркорлар қилган ишларидан пушаймонликларини билдирди. Ҳуқуқбузарларга нисбатан суд ҳукми билан қонуний жазо тайинланди.
Изоҳ (0)