2008-yildan beri “Matmurod Devonbegi” xususiy korxonasida rahbar lavozimida ishlab kelgan xivalik shaxs g‘arazli maqsadlarni ko‘zlab, bir qator qilmishlarni sodir etganligi oshkor bo‘ldi, deb yozadi “Huquq” gazetasi.
Uning boshchiligidagi xususiy korxona “Qishloq qurilish invest” MChJ bilan tuzilgan pudrat shartnomasiga asosan, 2013-yil aprel—dekabr oylarida Xiva tumanidagi “Eski qiyot” qishlog‘ida 10 ta namunaviy uylarni qurishda ishtirok etdi.
Bu jarayonda u avvaliga “Qishloq qurilish invest” MChJ texnik nazoratchisi bilan jinoiy til biriktirgan holda, haqiqatda bajarilmagan 20 million 508 ming so‘mlik ishlarni, keyinchalik boshqa ikki nazoratchi bilan kelishib, amalga bajarilmagan 135 million 478 ming hamda 50 million 776 ming so‘mlik qurilish ishlarini bajarilganligi to‘g‘risidagi hisob-fakturalarga soxta ma’lumotlar kiritadi.
Oqibatda davlatning 206 million 764 ming so‘mlik mablag‘ini o‘zlashtirib, talon-taroj qiladi. Qonun himoyachilari tomonidan korxona rahbari va uning hamtovoqlarining qilmishlari fosh etildi hamda tergov, sud jarayonlarida davlat manfaatlariga yetkazilgan zararning undirilishiga erishildi.
Izoh (0)