O‘zbekiston Respublikasi Prezidenti Islom Karimovning 2012-yil 24-oktabrdagi qaroriga muvofiq O‘zbekiston Respublikasi Mudofaa vazirligi huzurida Jamoatchilik kengashining tashkil etilganiga bu yil uch yil to‘ladi, deb xabar beradi O‘zbekiston Respublikasi Mudofaa vazirligi matbuot xizmati.
Kengashning ijodiy uyushmalar, xususan “O‘zbeknavo” estrada birlashmasi, “O‘zbekkino” davlat aksionerlik kompaniyasi, hokimiyat vakillari, uyushmalar, jamg‘armalar, ommaviy axborot vositalari vakillari, san’at va fan namoyandalari bilan hamkorlikda ishlarni tashkil etib borayotganligi belgilangan vazifalarni to‘laqonli bajarilishiga, harbiy xizmatchilarning qat’iy iroda va xarakter, faol hayotiy pozitsiyalarini yanada shakllantirish imkonini bermoqda.
O‘zbekiston milliy matbuot markazida “Mudofaa vazirligi huzuridagi Jamoatchilik kengashi hamda O‘zbekiston Respublikasi Qurolli Kuchlarida fuqarolik nazorati mexanizmlari” mavzusidagi Matbuot anjumanida Jamoatchilik kengashining Qurolli Kuchlar faoliyati ustidan olib borayotgan fuqarolik nazorati mexanizmlari, O‘zbekiston Respublikasi Mudofaa vazirligining faoliyati oshkora, ochiq-oydin olib borilishini ta’minlash, shuningdek, fuqarolar va jamoat uyushmalarini mudofaa va harbiy qurilish sohasida olib borilayotgan davlat siyosatini shakllantirib, hayotga tatbiq etish ishlariga jalb etish, harbiy kasb nufuzini oshirish, harbiy xizmatchilar va chaqiruvga tayyorlanayotgan o‘spirinlarni ma’naviy-axloqiy va harbiy vatanparvarlik ruhida tarbiyalash bo‘yicha olib borilayotgan ishlar haqida ma’lumotlar berildi.
Anjumanda Mudofaa vazirligi huzuridagi Jamoatchilik kengashi raisi, rais o‘rinbosarlari, kengashning komissiya raislari va barcha a’zolari, shuningdek Mudofaa vazirining o‘rinbosari hamda ommaviy axborot vositalari vakillari ishtirok etdi.
Izoh (0)