Gyote institutining Toshkentdagi vakolatxonasi OXUS Culture tashkiloti bilan hamkorlikda madaniyat va san’at sohasida faoliyat yuritayotgan yoshlar uchun ijtimoiy tarmoqlarda o‘z hududi madaniyati va san’ati, tarixiy obidalari, nomoddiy va moddiy madaniy yodgorliklari to‘g‘risida ma’lumotlar berish, madaniy mahsulotlarni keng tarqatish, xalqaro va hududlararo madaniy munosabatlarni yo‘lga qo‘yish maqsadlariga qaratilgan seminar-treninglar tashkil etmoqda. Bu haqda OXUS Culture’ning Facebook tarmog‘idagi sahifasida xabar berilmoqda.
Ushbu seminar-treningni respublikaning har bir hududi uchun o‘tkazish rejalashtirilgan bo‘lib, ilk seminar-treningda faqat qoraqalpog‘istonlik qiziquvchilar ishtirok etishlari mumkin.
Seminar-trening Toshkent shahrida shu yilning 3—5-iyul kunlari, Gyote instituti binosida tashkil etiladi. Ushbu loyihaning murabbiylari sifatida, hozirda xususiy sektor mahsulotlarini ijtimoiy tarmoqlarda reklama qilish, sahifalarini yuritishda katta tajribaga ega mutaxassislar taklif etilgan. Treningda turli ijtimoiy tarmoqlarning texnik imkoniyatlari, qoidalari, mazmun va mohiyati to‘g‘risida ma’lumot berish bilan birgalikda, ulardan foydalanishning amaliy asoslari ham o‘rgatiladi. Seminar yakunida loyiha hamkori Ucell mobil operatori tomonidan bir yillik belgilangan trafikka ega bepul internet aloqa USB-modem taqdim etiladi. Tanlovda ishtirok etish shartlari bilan yaqindan tanishish va ariza berish uchun oxusculture@gmail.com elektron manziliga murojaat qilish mumkin.
Treningga ishtirok etishni istovchilarning arizalari 15-iyunga qadar qabul qilinadi.
Izoh (0)