Yaqin yillar ichida O‘zbekistondagi konteyner terminallari soni 30 taga yetkaziladi, konteyner orqali yuk tashuvlari esa 20 foizga oshirilishi rejalashtirilgan, deb xabar beradi Uzbekistan Today.
Hozirgi kunda O‘zbekistonda konteyner orqali yuk tashish 7 foizni tashkil etadi. 2020-yilga borib esa bu raqamlarni 20 foizga ko‘tarish rejalashtirilgan. Bir yilda mamlakatda 500 ta konteyner ishlab chiqarish ham rejada bor.
Toshkentda o‘tkazilgan “O‘zbekiston—Latviya—YeI mamlakatlari transport yo‘lagi” xalqaro konferensiyasida aytilganidek, 2011-yildan 2015-yilgacha transport sohasiga deyarli 7 milliard dollar sarflandi. Soha rivojlanishining zaruriy sur’atlarini qo‘llab-quvvatlash uchun O‘zbekiston transport sektoriga kiritilgan investitsiyalar 2030-yilgacha taxminan 47 milliardni tashkil qilishi kerak.
Iqtisodiy tadqiqotlar markazi ekspertlari bergan bahoga ko‘ra, O‘zbekiston iqtisodini o‘rta muddatli istiqbolda 8 foizlik o‘sishini ushlab turish uchun yuk tashish hajmi har yili o‘rtacha 9,2 foizga o‘sishi kerak.
Anjuman Latviya aloqa vazirligi hamda Latviyaning O‘zbekistondagi elchixonasi ko‘magida Xalqaro biznes va texnologiyalar assotsiatsiyasi (AMBIT) va Biznes-logistikani rivojlantirish assotsiatsiyasi tomonidan tashkil etildi.
Izoh (0)