Vena sudi Qozog‘istonning Avstriyadagi sobiq elchisi va Qozog‘iston prezidenti Nursulton Nazarboyevning sobiq kuyovi – Rohat Aliyev ishi bo‘yicha ikki gumonlanuvchi – Alnur Musayev va Vadim Koshlyakni yana hibsda qoldirish haqida hukm chiqardi. Bu haqda “RIA Novosti” xabar bermoqda.
Aprel oyi oxirida sud Qozog‘iston xavfsizlik qo‘mitasining sobiq rahbari Musayev va prezidentni qo‘riqlash xizmati xodimi Koshlyakni sudgacha bo‘lgan hibsdan ozod etish haqida qaror chiqargandi. Musayev va Koshlyak qozog‘istonlik ikki bank menejerini o‘ldirganlikda ayblanmoqda.
Prokuratura ayblanuvchilarning hibsdan ozod etilishi haqidagi qaror ustidan shikoyat qilgandi. Vena oliy sudi esa prokurorlar protestini qanoatlantirdi. Advokatlarning so‘zlariga ko‘ra, gumondagi shaxslar Yozefshtadt qamoqxonasiga joylashtirilishi mumkin.
Mazkur jinoyat ishi bo‘yicha asosiy ayblanuvchi sudi Qozog‘istonning Avstriyadagi sobiq elchisi va Qozog‘iston prezidenti Nursulton Nazarboyevning sobiq kuyovi – Rohat Aliyev edi, biroq fevral oxirida u Venadagi qamoqxonada o‘zini osib, joniga qasd qildi.
Ayblov tomonining ta’kidlashicha, “Nurbank”ga egalik qilgan Aliyev o‘zini, uning ortidan zararga ishlaydigan operatsiyalarni amalga oshirgan bank menejerlari tomonidan aldangan deb hisoblagan. Shu sababli Aliyev, Musayev va Koshlyak 2007-yil fevralida til biriktirishgan, natijada ikki menejer – Jo‘ldas Timraliyev va Aybar Husenov plastik qop va arqon yordamida bo‘g‘ib o‘ldirilgan. Ularning jasadi 2011-yil may oyiga kelib chiqindixonada, ohak to‘ldirilgan metall bochkalarning ichidan topilgan.
Oqlov tomoni esa voqealaning bu talqinini “Qozog‘iston huquqni muhofaza qilish organlari tomonidan to‘qib chiqarilgan” deb hisoblamoqda. Ayblanuvchilarning advokatlari so‘zlariga ko‘ra, menejerlar Qozog‘iston rahbariyati ko‘rsatmasiga asosan maxsus xizmatlar tomonidan o‘ldirilgan, ayblanuvchilar esa Aliyevning prezidentlikka intilishlari sabab siyosiy ta’qib obyektiga aylanishgan. Advokatlarning ta’kidlashicha, ayblov tomoni Qozog‘iston huquqni mufohaza qilish idoralari tomonidan taqdim etilgan yolg‘on ma’lumotlarga qasddan asoslanmoqda.
Izoh (0)