Вена суди Қозоғистоннинг Австриядаги собиқ элчиси ва Қозоғистон президенти Нурсултон Назарбоевнинг собиқ куёви – Роҳат Алиев иши бўйича икки гумонланувчи – Алнур Мусаев ва Вадим Кошлякни яна ҳибсда қолдириш ҳақида ҳукм чиқарди. Бу ҳақда «РИА Новости» хабар бермоқда.
Апрель ойи охирида суд Қозоғистон хавфсизлик қўмитасининг собиқ раҳбари Мусаев ва президентни қўриқлаш хизмати ходими Кошлякни судгача бўлган ҳибсдан озод этиш ҳақида қарор чиқарганди. Мусаев ва Кошляк қозоғистонлик икки банк менежерини ўлдирганликда айбланмоқда.
Прокуратура айбланувчиларнинг ҳибсдан озод этилиши ҳақидаги қарор устидан шикоят қилганди. Вена олий суди эса прокурорлар протестини қаноатлантирди. Адвокатларнинг сўзларига кўра, гумондаги шахслар Йозефштадт қамоқхонасига жойлаштирилиши мумкин.
Мазкур жиноят иши бўйича асосий айбланувчи суди Қозоғистоннинг Австриядаги собиқ элчиси ва Қозоғистон президенти Нурсултон Назарбоевнинг собиқ куёви – Роҳат Алиев эди, бироқ февраль охирида у Венадаги қамоқхонада ўзини осиб, жонига қасд қилди.
Айблов томонининг таъкидлашича, «Нурбанк»га эгалик қилган Алиев ўзини, унинг ортидан зарарга ишлайдиган операцияларни амалга оширган банк менежерлари томонидан алданган деб ҳисоблаган. Шу сабабли Алиев, Мусаев ва Кошляк 2007 йил февралида тил бириктиришган, натижада икки менежер – Жўлдас Тимралиев ва Айбар Ҳусенов пластик қоп ва арқон ёрдамида бўғиб ўлдирилган. Уларнинг жасади 2011 йил май ойига келиб чиқиндихонада, оҳак тўлдирилган металл бочкаларнинг ичидан топилган.
Оқлов томони эса воқеаланинг бу талқинини «Қозоғистон ҳуқуқни муҳофаза қилиш органлари томонидан тўқиб чиқарилган» деб ҳисобламоқда. Айбланувчиларнинг адвокатлари сўзларига кўра, менежерлар Қозоғистон раҳбарияти кўрсатмасига асосан махсус хизматлар томонидан ўлдирилган, айбланувчилар эса Алиевнинг президентликка интилишлари сабаб сиёсий таъқиб объектига айланишган. Адвокатларнинг таъкидлашича, айблов томони Қозоғистон ҳуқуқни муфоҳаза қилиш идоралари томонидан тақдим этилган ёлғон маълумотларга қасддан асосланмоқда.
Изоҳ (0)