Ўзбекистонда мамлакат ҳудудига Яқин Шарқ респиратор синдроми (ЯШРС/MERS) коронавируси олиб келиниши ва тарқалишига йўл қўймаслик бўйича чоралар кўрилмоқда, деб ёзади «Газета.uz» Соғлиқни сақлаш вазирлигига таяниб.
Барча халқаро аэропортларда мамлакатга кириб келаётган йўловчиларни тиббий мониторингдан ўтказиш ташкил қилинди, бунда замонавий қурилмалар ёрдамида йўловчиларнинг ҳарорати ўлчанади. Яқин Шарқ ва Корея Республикасидан учиб келаётган авиайўловчилар айниқса эътибор билан текширилмоқда.
Мамлакатда ўткир респиратор инфекциялари ва зотилжам ҳолатлари устидан эпидемиологик назорат олиб борилмоқда. Барча инфекцион касалхоналарда коронавирусга чалинган деб гумон қилинганларни ётқизиш ва даволаш учун шароитлар тайёрлаб қўйилган. Яқин Шарқ минтақасига учиб кетаётган шахслар учун шахсий хавфсизлик чораларига риоя қилиш бўйича эслатмалар ишлаб чиқилган.
Нашр эслатишича, май ойининг иккинчи ярмида Корея Республикаси Соғлиқни сақлаш вазирлиги MERS коронавируси билан касалланиш бўйича илк ҳолатлар ҳақида эълон қилди. Сўнгги икки ҳафта ичида коронавирус тезлик билан тарқалмоқда. 5 июнь ҳолатига кўра, Кореяда 41 киши касалланди, уларнинг тўрт нафари вафот этди (8 июнь ҳолатига кўра, қурбонлар сони олти кишига етди).
Изоҳ (0)