Aleksey Yevstafeyev murabbiyligidagi O‘zbekiston o‘smirlar terma jamoasida porlab, o‘zbek futbolining kelajagi sifatida e’tirof etilib, keyinchalik deyarli “yo‘q” bo‘lib qolgan Temur Hakimovni muxlislar hali unutishmagan bo‘lsa kerak. Bugungi kunda birinchi liga vakili Toshkentning “Oq-tepa” jamoasida o‘ynayotgan hujumchi bilan suhbat “Arena.uz” saytida chop qilindi.
2011-yilda Meksika maydonlarida o‘tkazilgan o‘smirlar o‘rtasidagi jahon chempionatida O‘zbekiston chorak finalgacha yetib borgandi. O‘sha musobaqada 3 ta to‘p kiritgan Hakimov O‘zbekistonning yetakchilaridan biriga aylangandi. Futbolchi turnirdan so‘ng o‘ziga nima bo‘lgani haqida aytib berdi.
“Buni ko‘pchilik biladi. O‘zim ham yashirmayman. Bunaqa yoshda o‘smir bolalarda keskin o‘zgarishlar yuz beradi. Bu xaraktermi yoki boshqami bilmayman. Men bilan birinchi marta yuz berdi. Xullas, yulduzlik kasaliga chalindim. Hali hech narsa qilmagan bo‘lsamda, juda vaqtli ‘yulduz’ni ushlab olgan ekanman! Shundan keyin hamma narsa o‘zgarib ketdi. Lekin o‘z vaqtida xatoimni tushunib yetdim.
Meksika maydonlaridagi, Osiyo chempionatidagi voqealar, xursandchiliklar tarixda qoldi. Inson o‘sha tarixni eslab yuraversa, o‘smaydi. Shuni tushunib yetdimki, men hali hech kim emasman, barchasini boshidan boshlash kerak”.
Izoh (0)