FIFA prezidenti Yozef Blatter korrupsion mojaro sabab iste’foga chiqishini e’lon qildi. Meduza.io xabariga ko‘ra, tashkilotning yangi rahbarini saylash uchun FIFAning navbatdan tashqari kongressi chaqiriladi.
“Menga FIFA tomonidan mandat (ishonch) bildirilgan bo‘lsa-da, men butun futbol dunyosining ishonchini his qilayotganim yo‘q”, - dedi Blatter.
FIFA vakili Domeniko Skalaning ma’lum qilishicha, tashkilotning navbatdan tashqari kongressi 2015-yilning dekabridan 2016-yilning martiga qadar bo‘lgan oraliqda chaqiriladi.
“FIFA manfaatlari men uchun muhim. Shu sababli ham men iste’fo haqidagi qarorni qabul qildim”, - dedi Blatter.
Blatter departs. pic.twitter.com/areGUTZysE
— Richard Conway (@richard_conway) June 2, 2015
Yozef Blatter 1998-yildan beri FIFAga rahbarlik qilib kelayotgandi. 29-may kuni u navbatdagi muddatga saylangan edi.
FIFA prezidenti saylovi arafasida, 28-may kuni AQSHning so‘rovi asosida Syurixdagi mehmonxonada FIFAning yetti nafar yuqori martabali vakili hibsga olindi. Ularni 20 yil davomida FIFA xodimi sifatida pora olganlikda ayblashmoqda.
Shu bilan birga, Shveysariya 2018- va 2022-yilgi jahon chempionatlari mezbonligini mos ravishda Rossiya va Qatarga berilishi yuzasidan tergov harakatlarini boshladi.
Izoh (0)