Англиянинг «Ньюкасл» клуби ярим ҳимоячиси Хонас Гутьеррес клуб билан хайрлашаётганидан телефон қўнғироғи орқали хабар топган. Бу ҳақда ESPN хабар қилмоқда.
Клуб бош мураббийи Жон Карвер олдинига жамоа фахрийси Райан Тейлорга қўнғироқ қилиб, уни ишдан бўшатган. Кейин эса Тейлордан телефон гўшагини уни яқинида турган Гутьерресга беришни сўраган.
«Клуб менга янги шартнома таклиф қилмаслигини тахмин қилгандим. Мен кўп нарсани кўрганман, лекин клуб вакили шахсан менга ёки ҳеч бўлмаса агентимга қўнғироқ қилиб, бу хабарни айтиши мен учун муҳим эди», — деди Гутьеррес.
Англия чемпионатининг сўнгги туридаги «Вест Хэм» билан ўйинда 31 ёшли аргентиналик футболчи гол киритди ва яна бир голга ассистентлик қилди. «Ҳаккалар»нинг 2:0 ҳисобидаги ғалабаси эвазига «Ньюкасл» Премьер-лигадаги ўрнини сақлаб қолганди.
Гутьеррес 2014 йилнинг сентябрида саратон билан касалланганини маълум қилган. 2014 йилнинг декабрь ойида эса у даволаниб майдонга қайтган. Аргентиналик футболчи «Ньюкасл» сафида 2008 йилдан бери тўп суриб келаётганди.
Изоҳ (0)