O‘zbekiston Respublikasi ko‘zi ojizlar jamiyati markaziy boshqaruvida mas’ul lavozimda ishlagan xodim mansabni boylik orttirish, boshqalar ustidan hukmronlik qilish uchun qulay imkoniyat deb hisobladi. Bu haqda “Huquq” gazetasi xabar bermoqda.
Ko‘zi ojizlarni ish bilan ta’minlovchi korxonalardan biri Chust tumanida joylashgan bo‘lib, ushbu ishlab chiqarish majmuasiga belgilangan miqdorda paxta tolasi va lint ajratish nazarda tutilgan. Mas’ul xodim esa bu masalani o‘z xizmat majburiyatlaridan kelib chiqib amalga oshirishni istamadi. U ko‘zi ojiz fuqarolar ishlaydigan Chust o‘quv ishlab chiqarish korxonasi rahbariga “Paxtasanoat” uyushmasidan 150 tonna paxta linti va 20 tonna tola olib ketishiga rozilik xatini yozib berish uchun “haq” talab qildi. Korxona kelajagini o‘ylagan rahbar 4500 AQSh dollarini olib kelib berdi-da, rozilik xatini oldi.
Ko‘zi ojizlar jamiyatining Farg‘ona viloyat boshqarmasi vakili ham 50 tonna paxta linti hamda 10 tonna tolani olish uchun rozilik xati so‘radi. Mas’ul xodim gap orasida “xizmat haqi”ni tushuntirib qo‘ydi. Farg‘ona viloyati boshqarmasi vakili “tushunarli”, degandek bosh silkib chiqib ketdi va bu haqda kerakli joyga ariza bilan murojaat qildi.
Mas’ul xodim o‘z xonasida 1250 AQSh dollarini pora tariqasida olayotgan vaqtida huquqni muhofaza qiluvchi organ xodimlari tomonidan qo‘lga olindi. Jinoyat ishlari bo‘yicha Toshkent shahar sudi o‘z mansabini suiiste’mol qilgan shaxsni 6 yilga ozodlikdan mahrum qildi.
Izoh (0)