Ўзбекистон Республикаси кўзи ожизлар жамияти марказий бошқарувида масъул лавозимда ишлаган ходим мансабни бойлик орттириш, бошқалар устидан ҳукмронлик қилиш учун қулай имконият деб ҳисоблади. Бу ҳақда «Ҳуқуқ» газетаси хабар бермоқда.
Кўзи ожизларни иш билан таъминловчи корхоналардан бири Чуст туманида жойлашган бўлиб, ушбу ишлаб чиқариш мажмуасига белгиланган миқдорда пахта толаси ва линт ажратиш назарда тутилган. Масъул ходим эса бу масалани ўз хизмат мажбуриятларидан келиб чиқиб амалга оширишни истамади. У кўзи ожиз фуқаролар ишлайдиган Чуст ўқув ишлаб чиқариш корхонаси раҳбарига «Пахтасаноат» уюшмасидан 150 тонна пахта линти ва 20 тонна тола олиб кетишига розилик хатини ёзиб бериш учун «ҳақ» талаб қилди. Корхона келажагини ўйлаган раҳбар 4500 АҚШ долларини олиб келиб берди-да, розилик хатини олди.
Кўзи ожизлар жамиятининг Фарғона вилоят бошқармаси вакили ҳам 50 тонна пахта линти ҳамда 10 тонна толани олиш учун розилик хати сўради. Масъул ходим гап орасида «хизмат ҳақи»ни тушунтириб қўйди. Фарғона вилояти бошқармаси вакили «тушунарли», дегандек бош силкиб чиқиб кетди ва бу ҳақда керакли жойга ариза билан мурожаат қилди.
Масъул ходим ўз хонасида 1250 АҚШ долларини пора тариқасида олаётган вақтида ҳуқуқни муҳофаза қилувчи орган ходимлари томонидан қўлга олинди. Жиноят ишлари бўйича Тошкент шаҳар суди ўз мансабини суиистеъмол қилган шахсни 6 йилга озодликдан маҳрум қилди.
Изоҳ (0)