Jizzaxlik kollej direktori o‘qituvchilarning 2 mln 250 ming so‘mlik oyliklarini o‘zlashtirib oldi

O‘zbekistonda ta’lim muassasalari moliya-xo‘jalik faoliyatini amalga oshirishning huquqiy asoslarini belgilab beruvchi qonunlar va qonun-osti hujjatlar qabul qilingan. Biroq bu sohada ham ayrim “uddaburon” shaxslar mazkur hujjatlar talablariga zid ishlarni amalga oshirmoqda, deb xabar beradi “Huquq” gazetasi.

Jumladan, Zarbdor tumanidagi kasb-hunar kollejlaridan birining direktori lavozimida ishlagan shaxs, 2013—2014-yillar davomida o‘qituvchilarga majburiy ravishda to‘lov qaydnomalariga imzo qo‘ydirib, ularning 2 million 244 ming so‘mlik ish haqlarini noqonuniy tarzda ushlab qoladi va bu pullarni shaxsiy ehtiyojlariga ishlatib yuboradi.

Shuningdek, kollej ixtiyorida bo‘lgan 2 dona isitish qozonini 10 million so‘mga noma’lum shaxslarga sotib yuborib, davlat mulkini talon-toroj qiladi. Nafsi hakalak otgan direktor jinoiy harakatlarini davom ettirib, kollej balansida turgan nusxa ko‘chirish apparatini ham ta’mirlash bahonasida talon-toroj qiladi.

Jinoyat jazosiz qolmaydi. Sud hukmi bilan direktorning qilmishiga yarasha jazo tayinlandi.