O‘zbekiston Badiiy akademiyasi Kamoliddin Behzod nomidagi memorial-bog‘ muzeyida tashkil etilgan Aleksandr Viner ijodiga bag‘ishlangan ko‘rgazma ochilishida musavvirning qizi, rossiyalik milliarderning turmush o‘rtog‘i Irina Viner-Usmonova ishtirok etdi. Bu haqda Kultura.uz xabar bermoqda.
Urush ishtirokchisi bo‘lgan musavvir janglarda og‘ir yaralanib, O‘zbekistonga, Samarqand shahriga evakuatsiya qilingach, umr bo‘yi shu tabarruk zaminga, uning saxiy va mehridaryo xalqiga maftun bo‘ladi. Taqdirini O‘zbekiston, uning xalqi bilan uyg‘un tasavvur etgan mo‘yqalam sohibi O‘zbekistonning manzaralari, me’moriy obidalarini, shu tabarruk zaminning odamlari, ularning orzu-intilishlari, hayoti, mehnati, qadriyatlarini o‘z ijodida aks ettiradi.
Agar 1950-yillar musavvir uchun ijodiy materialga tanlangan mavzuni puxta o‘rganish, to‘plash, o‘ylagan muayyan g‘oyalarini shakllantirish davri bo‘lgan bo‘lsa, 1960-1970-yillar xalqning hayoti, ibratli an’ana va qadriyatlari, milliy mentaliteti bilan bog‘liq musavvir ko‘nglida mehr uyg‘otgan g‘oyalarni aks ettirish davri bo‘ldi.
O‘zbekistonning turli hududlariga borib, bo‘lajak asar qahramonlari hayotini keng va atroflicha o‘rganib, so‘ngra kartinalar yaratish uning ijodida asosiy o‘rin tutadi. Bu rassom kartinalarining hayotiyligi, samimiyat bilan yo‘g‘rilgani, tomoshabin mehrini qozonishida asosiy omil edi. Bugungi kunda rassom asarlari O‘zbekistondagi ko‘plab muzeylar va san’at galereyalarida saqlanmoqda.
“O‘zbekistonda madaniyat, san’at, sport ravnaqiga qaratilayotgan ulkan e’tibor va g‘amxo‘rlik har qadamda yaqqol namoyon bo‘ladi. O‘zbekistonga, uning xalqiga, maftunkor tabiatiga bo‘lgan mehrni otamdan o‘rgandim. Ko‘rgazma tashkilotchilariga chin yurakdan minnatdorlik bildiraman”, – deydi musavvirning qizi Irina Viner.
O‘zAning xabar berishicha, ko‘rgazmada Aleksandr Vinerning O‘zbekiston davlat san’at muzeyi, Badiiy ko‘rgazmalar direksiyasi, Angren shahridagi san’at galereyasida saqlanayotgan ko‘plab kartinalari tomoshabinlar e’tiboriga havola etilgan. “Samarqanddagi hovuz”, “Teraklar”, “Alvon durrali qiz”, “Dugonalar”, “Shaxtyor”, “Cho‘ponlar”, “Urush faxriysi portreti”, “Brigadir”, “Dutorchi qiz Ibodatxon” kabi asarlari san’at ixlosmandlarida qiziqish uyg‘otmoqda.
Izoh (0)