O‘zbekiston Prezidenti Islom Karimov 22-may kuni yangi tahrirdagi “Elektron tijorat to‘g‘risida”gi qonunni imzoladi, deya xabar bermoqda “Gazeta.uz”. Hujjat matni “Xalq so‘zi” gazetasida chop etildi.
U Oliy Majlis Qonunchilik palatasi tomonidan 17-aprelda qabul qilingan, 15-mayda Senat tomonidan tasdiqlangan edi. Qonun 23-maydan kuchga kirdi.
Hujjatda belgilanishicha, axborot tizimlaridan foydalangan holda tuziladigan shartnomaga muvofiq amalga oshiriladigan tovarlar (ishlar, xizmatlar) oldi-sotdisi elektron tijoratdir.
Elektron tijoratning asosiy prinsiplari quyidagilardan iborat:
elektron tijoratda tadbirkorlik faoliyatini amalga oshirish erkinligi;elektron tijoratda shartnomalar tuzishning ixtiyoriyligi;elektron tijoratda ishtirok etish shart-sharoitlarining tengligi;elektron tijorat ishtirokchilarining huquqlari va qonuniy manfaatlari himoya qilinishi.
Elektron tijoratdagi elektron hujjatlar, shuningdek elektron shaklda qayd etilgan, yuboruvchisini identifikatsiya qilish imkoniyatini beradigan axborot (bundan buyon matnda elektron xabarlar deb yuritiladi) o‘z qo‘li bilan imzolangan qog‘ozdagi hujjatlarga tenglashtiriladi va ulardan bitimlar tuzilganligining dalili sifatida foydalanilishi mumkin.
Elektron tijoratdagi shartnoma faqat axborot tizimlaridan foydalanilgan holda tuzilganligiga asoslanib haqiqiy emas deb topilishi mumkin emas.
Elektron tijoratda oferta elektron hujjat tarzida tuziladi.
Elektron tijorat ishtirokchisining oferta qabul qilinganligi to‘g‘risidagi javobi (aksept) elektron hujjat yoki elektron xabar tarzida yoxud ofertada ko‘rsatilgan shartlarni bajarish bo‘yicha harakatlarni sodir etish yo‘li bilan amalga oshirilishi mumkin.
Qonunda qayd etilishicha, elektron tijoratda tovarlarni (ishlarni, xizmatlarni) sotuvchi yoki ularning xaridori bo‘lgan yuridik yoki jismoniy shaxs elektron tijorat ishtirokchisidir.
Elektron tijoratda tovarlarni (ishlarni, xizmatlarni) sotuvchi yuridik shaxs yoki yakka tartibdagi tadbirkor hisoblanadi.
Elektron tijoratda ishtirok etish, agar qonunda boshqacha qoida belgilanmagan bo‘lsa, uning ishtirokchisiga nisbatan axborot tizimlaridan foydalanmasdan amalga oshirilayotgan tadbirkorlik faoliyatiga nisbatan qo‘shimcha talablar yoki cheklovlar belgilanishi uchun asos bo‘la olmaydi.
Shuningdek hujjatda elektron tijorat ishtirokchisining huquq va majburiyatlari, axborot vositachisining huquq va majburiyatlari, elektron tijoratdagi shartnoma shartlari, elektron tijoratda ofertaga qo‘yiladigan talablar va boshqa tafsilotlar keltirib o‘tilgan.
Izoh (0)