Ўзбекистон Бадиий академияси Камолиддин Беҳзод номидаги мемориал-боғ музейида ташкил этилган Александр Винер ижодига бағишланган кўргазма очилишида мусаввирнинг қизи, россиялик миллиардернинг турмуш ўртоғи Ирина Винер-Усмонова иштирок этди. Бу ҳақда Kultura.uz хабар бермоқда.
Уруш иштирокчиси бўлган мусаввир жангларда оғир яраланиб, Ўзбекистонга, Самарқанд шаҳрига эвакуация қилингач, умр бўйи шу табаррук заминга, унинг сахий ва меҳридарё халқига мафтун бўлади. Тақдирини Ўзбекистон, унинг халқи билан уйғун тасаввур этган мўйқалам соҳиби Ўзбекистоннинг манзаралари, меъморий обидаларини, шу табаррук заминнинг одамлари, уларнинг орзу-интилишлари, ҳаёти, меҳнати, қадриятларини ўз ижодида акс эттиради.
Агар 1950 йиллар мусаввир учун ижодий материалга танланган мавзуни пухта ўрганиш, тўплаш, ўйлаган муайян ғояларини шакллантириш даври бўлган бўлса, 1960-1970 йиллар халқнинг ҳаёти, ибратли анъана ва қадриятлари, миллий менталитети билан боғлиқ мусаввир кўнглида меҳр уйғотган ғояларни акс эттириш даври бўлди.
Ўзбекистоннинг турли ҳудудларига бориб, бўлажак асар қаҳрамонлари ҳаётини кенг ва атрофлича ўрганиб, сўнгра картиналар яратиш унинг ижодида асосий ўрин тутади. Бу рассом картиналарининг ҳаётийлиги, самимият билан йўғрилгани, томошабин меҳрини қозонишида асосий омил эди. Бугунги кунда рассом асарлари Ўзбекистондаги кўплаб музейлар ва санъат галереяларида сақланмоқда.
«Ўзбекистонда маданият, санъат, спорт равнақига қаратилаётган улкан эътибор ва ғамхўрлик ҳар қадамда яққол намоён бўлади. Ўзбекистонга, унинг халқига, мафтункор табиатига бўлган меҳрни отамдан ўргандим. Кўргазма ташкилотчиларига чин юракдан миннатдорлик билдираман», – дейди мусаввирнинг қизи Ирина Винер.
ЎзАнинг хабар беришича, кўргазмада Александр Винернинг Ўзбекистон давлат санъат музейи, Бадиий кўргазмалар дирексияси, Ангрен шаҳридаги санъат галереясида сақланаётган кўплаб картиналари томошабинлар эътиборига ҳавола этилган. «Самарқанддаги ҳовуз», «Тераклар», «Алвон дуррали қиз», «Дугоналар», «Шахтёр», «Чўпонлар», «Уруш фахрийси портрети», «Бригадир», «Дуторчи қиз Ибодатхон» каби асарлари санъат ихлосмандларида қизиқиш уйғотмоқда.
Изоҳ (0)