2012-yilda surxondaryolik qiz qo‘shnining o‘g‘ilchasiga enagalikka yollanadi. Qiz voyaga yetmaganiga qaramay, uning onasi qizi ishlab pul topishiga rozilik bildirgandi, deb xabar qiladi “Huquq” gazetasi.
Qiz qo‘shnisining o‘g‘lini bog‘chaga kuzatar, olib kelar, ota-onasi yo‘q paytda unga qarab turardi. Shunday kunlarning birida uyga kelgan xonadon egasi o‘g‘liga enagalik qilayotgan qiz yolg‘iz o‘tirganini ko‘rib qolib, fikri buziladi. So‘ngra u qizga tashlanadi va kuch ishlatib, uning nomusiga tegadi. Keyin esa “Agar bo‘lgan ish haqida birovga aytsang, o‘ldiraman”, deb dag‘dag‘a qiladi…
Oradan ikki yil o‘tadi, ammo qiz bo‘lib o‘tgan hodisa haqida birovga lom-mim demaydi. Vaqt o‘tib, u kollejga o‘qishga kiradi. Shundan keyingina qo‘shnisining qilmishi tufayli o‘zining nomusi toptalganligini tushuna boshlaydi. Qizining xatti-harakatlarida o‘zgarishlar bo‘layotganini sezgan ona uni yoniga chaqirib, hammasidan xabar topadi va ona-bola najot istab, huquq-tartibot organlariga murojaat qiladi.
Dastlabki tergov hamda surishtiruv natijalari, tibbiy ekspertiza xulosalari haqiqatda ham qo‘shni erkak voyaga yetmagan qizni qo‘rqitib, uning ojizligidan foydalanganligini tasdiqladi.
Sud hukmiga ko‘ra ayblanuvchi O‘zbekiston Respublikasi Jinoyat kodeksining 118-moddasi, 4-qismi bilan aybdor deb topildi va unga 15 yilga ozodlikdan mahrum qilish jazosi tayinlandi.
Izoh (0)