Gulistonlik fuqaro halol mehnat bilan oilasini boqish va boshqalarga o‘xshab tinch yashash o‘rniga hali 30 yoshga kirmasidanoq bir necha bor sudlanishga ulgurdi. Lekin u jazolardan o‘ziga tegishli xulosa chiqarmadi, deb xabar beradi “Huquq” gazetasi.
U Guliston tumani elektr tarmoqlari korxonasiga nazoratchi vazifasiga ishga kirganidan so‘ng fuqarolarni aldab, ularning ishonchini suiiste’mol qildi.
Elektr nazoratchisi Guliston tumanida yashovchi fuqarolardan birining elektr hisoblagichini tekshiradi va elektr energiyasidan qarzlari ko‘payib ketganini aytib, to‘lab qo‘yish sharti bilan 100 ming so‘m oladi. Unga esa soxtalashtirilgan to‘lov kvitansiyasini beradi. Nazoratchi shu hududda yashovchi yana ikki fuqarodan tegishlicha, 120 ming va 200 ming so‘m oladi. Bu pullar ham uning cho‘ntagiga tushdi.
Aldangan fuqarolar tegishli joyga ariza bilan murojaat qildi. Soliq, valyutaga oid jinoyatlarga va jinoiy daromadlarni legallashtirishga qarshi kurashish (SVOJJDLQK) departamentining Guliston shahar bo‘limi tomonidan elektr nazoratchisining ushbu harakatlari yuzasidan jinoyat ishi qo‘zg‘atildi. Uning qilmishlarini atroflicha ko‘rib chiqqan sud firibgarga tegishli jazo tayinlab, hukm chiqardi.
Izoh (0)