2012 йилда сурхондарёлик қиз қўшнининг ўғилчасига энагаликка ёлланади. Қиз вояга етмаганига қарамай, унинг онаси қизи ишлаб пул топишига розилик билдирганди, деб хабар қилади «Ҳуқуқ» газетаси.
Қиз қўшнисининг ўғлини боғчага кузатар, олиб келар, ота-онаси йўқ пайтда унга қараб турарди. Шундай кунларнинг бирида уйга келган хонадон эгаси ўғлига энагалик қилаётган қиз ёлғиз ўтирганини кўриб қолиб, фикри бузилади. Сўнгра у қизга ташланади ва куч ишлатиб, унинг номусига тегади. Кейин эса «Агар бўлган иш ҳақида бировга айтсанг, ўлдираман», деб дағдаға қилади…
Орадан икки йил ўтади, аммо қиз бўлиб ўтган ҳодиса ҳақида бировга лом-мим демайди. Вақт ўтиб, у коллежга ўқишга киради. Шундан кейингина қўшнисининг қилмиши туфайли ўзининг номуси топталганлигини тушуна бошлайди. Қизининг хатти-ҳаракатларида ўзгаришлар бўлаётганини сезган она уни ёнига чақириб, ҳаммасидан хабар топади ва она-бола нажот истаб, ҳуқуқ-тартибот органларига мурожаат қилади.
Дастлабки тергов ҳамда суриштирув натижалари, тиббий экспертиза хулосалари ҳақиқатда ҳам қўшни эркак вояга етмаган қизни қўрқитиб, унинг ожизлигидан фойдаланганлигини тасдиқлади.
Суд ҳукмига кўра айбланувчи Ўзбекистон Республикаси Жиноят кодексининг 118-моддаси, 4-қисми билан айбдор деб топилди ва унга 15 йилга озодликдан маҳрум қилиш жазоси тайинланди.
Изоҳ (0)